Des is fei wahr und is kei Witz
Die G’schicht fo unsrä Christbaumspitz.
Des war a schene Spitz jawull
Fo auß’n silbri und inna hull
Drum had mei Frau g’sagt „Gouder Fritz
Gib ma fei obacht auf die Christbaumspitz!“
Und i hab grod den christbam putzt
Und häd mi werkli bald dahutzt
Und wals pressiert had do drum eben
Lang i mit meiner Händ‘ danebn.
Der Mensch macht manchmal blödi Schnitz – Am Bud’n liegt die Christbaumspitz.
Die Frau die wor grad net zur Schdell
Drum hab i denkt, et’s handelst schnell
Die Hinterseid’n war lädiert
Drum hab is g’scheit mit Leim o’gschmiert
Hob’s wieder naufpappt auf ihr’n Sitz
Gleich hie am Bam die Christbaumspitz.
Wer’s g’wußt hätt, der hätt’s deutli g’sehn,
doch i hab goanix g’sacht desweng.
Doch bei der B’scherung – des war dumm
Mir stena under’m Christbaum rum
Und weii mei Frau singt „Einsam wacht“,
dou hat’s auf amal komisch kracht.
I merk, weii i ganz plötzli schwitz,
am Bod’n liegt die Christbaumspitz.
I hab blous mit die Achseln zuckt
Und hab an maner Krawatt’n krukt
Und hab g’sagt
„Dou is schould blous dei unheimlich Singerei,
die kräftig Tön, die ham’s zahout,
Warum bläckst’n immer a su laut?
Du schnulzt ja viel zu viel Lakritz,
siegst, et’s is hie, die Christbaumspitz“.
In Werglikeit is anders g’west,
der Leim der hat sie langsam g’lest
und hat halt nimmer a su pappt,
drum hot die Spitz sich g’lockert g’habt
und schuld dro war die Aff’nhitz
und i mit meiner Christbaumspitz.
– verändert nach Franz Bauer –